Hitman1
عضو سوبر
|  موضوع: حدوتة الشعب المطحون  الخميس 29 يوليو 2010, 4:40 pm |
| كان ياما كان
شعب مسكين شقيان
من قسوة الدنيا تعبان
شعب بيهدم فيه الزمان
عايش في الغيبوبة ولا دريان
باللي بياكلوا حق الغلبان
ويضيعوا كرامة الانسان
وآدى واحد من الشعب
ماشي بيكلم نفسه من الغلب
بيقول الاقيها منين ولا منين؟؟
لا انا ولا عيالي عايشين!!
كل همه يأكل عياله المساكين
بيشتغل شغلانة واتنين
وبرضو مش مكفيين
عالأكل حتى مش قادرين
ودى عيشة يرضاها بس مين
وأهو ساكت وراضي وعايش مع العايشين
ودي ست كبيرة غلبانة
من سعيها ورا المعاش تعبانة
بتقول حسبي الله ونعم الوكيل
الله يلعن أبوالروتين
ودة طفل نايم عالرصيف
مستني حد يديله جنيه ولا رغيف
وغيره كتير أطفال مالهمش ذنب
في الشارع عايشين وبيقولوا يارب
وهنا ناس ضحايا الاهمال
اشتكوا مليون مرة لكن ولا عالبال
لحد ما وقعت الصخور عليهم
وشافوا الموت بعينيهم
طفل برئ ماتت أمه
وطفلة ماتت في حضن أمها
لا الطفل هيلاقي حد يشيل همه
ولا المسكينة كمل حلمها
كل دة واحنا ساكتين
وبنقول أدينا عايشين
كل واحد بيقول وأنامالي
أنا عايز أعيش في حالي
اسكت يا عم انا عايز اربي عيالي
اللي يموت يموت وأنا مالي
آه يا شعب مطحون
يا شعب غرقان في الديون
كل دة واحنا ساكتين
وبنقول ادينا عايشين
عايشين بس في غيبوبة
واللعبة من الكبار ملعوبة
إمتى هنصرخ ونقول لأ
إمتى هنقول كلمة حق
لحد إمتى هنفضل ساكتين
دول باعوا البلد وإحنا مش دريانين
باعوا مصر بكل ما فيها
ولو طالوا هيبيعوا المصريين
ياشعب عايش مظلوم
يا شعب حقه مهضوم
اصرخ يا شعب مطحون
كفايانا كلام مزيون
لحد امتى هتطاطي وتقول نعم
وأنت بتتعذب من الألم
يا شعب كفاية كدة وقول لأ
ولمرة واحدة اصرخ وقول الحق
ولا خلاص اتهدم الحلم
والخوف بقى في الدم
اصرخ وخلي عندك دم
واياك تنخدع بحلاوة السم
دة كله كلام مزيون
دة كله ضحك عالدقون
هتصحى تلاقي البلد اتباعت
دة كله وانت عايش وساكت
اصرخ بقى واصحى من الغيبوبة
واهي قصة وعالجبين مكتوبة
قصة حاكــم ملعون بكلامه المزيون
وحدوتة الشعب المطحون
|
|
الرئيسية 
البوابة 
أحدث الصور 
التسجيل 
دخول 
الجنس
